Озмуни «Китобдор, китобхона ва китобхонаи шахсии сол дар Ҷумҳурии Тоҷикистон»

Душанбе, 28.06.2016 /АМИТ «Ховар»/. Ба муносибати 25-солагии Истиқлолияти давлатии Ҷумҳурии Тоҷикистон ва бахшида ба «Рӯзи китоб» Китобхонаи давлатии патентию техникии Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон  4 сентябр озмуни ҷумҳуриявии «Китобдор, китобхона ва китобхонаи шахсии сол дар Ҷумҳурии Тоҷикистон» барои  соли 2015 баргузор менамояд.
Мақсади асосии озмун баланд бардоштани мақоми китоб, самаранокӣ ва сифати кори китобдор ва китобхона дар ҷомеа, ташвиқ ва тарғиби соҳаи китобдорӣ, муайян ва муаррифӣ намудани фаъолияти босамар дар байни китобхонаҳо ва кормандони он, ҳавасмандгардонии китобдорону китобхонаҳо ва ташвиқу тарғиби мутолиаи китоб дар байни аҳолии кишвар мебошад.
Тибқи талаботи озмун ҳуҷҷатҳо аз 25 июн то 20 августи соли 2016 аз ҷониби Кумитаи тадорукоти озмун қабул карда мешавад.
Иштирокдорони озмун аз ҷониби ҳайати ҳакамон, тибқи ҳуҷҷатҳои пешниҳоднамуда баҳогузорӣ карда мешаванд.
Озмун аз рӯи се номгӯй- «Китобдори сол», «Китобхонаи сол» ва «Китобхонаи шахсии сол» гузаронида шуда, ба ғолибони озмун аз ҷониби Кумитаи тадорукот дипломҳо, ифтихорномаҳо, туҳфаҳои хотиравӣ ва ҷоизаи «Гран-при» супорида мешаванд.
Натиҷаи озмун 4 сентябр дар «Рӯзи китоб» дар шаҳри Душанбе дар семинари ҷумҳуриявии соҳаи китобдорӣ эълон карда мешавад.