Пешгирии бемории сил дар Восеъ

Восеъ, 16.06.2016 /АМИТ «Ховар»/. Хуруҷи бемории сил дар баъзе ноҳияҳо, хусусан ноҳияҳои Восеъ ва Ҳамадонӣ масъулини соҳаро ба ташвиш оварда буд ва ба ин хотир соли  2012 дар ноҳияи Восеъ Беморхонаи байниноҳиявии бемориҳои сил бо 60 кат мавриди истифода қарор дода шуд.
Давоми беш аз се сол дар ин беморхона даҳҳо нафар беморон аз ноҳияҳои минтақаи Кӯлоб табобат гирифтанд. Тавре сардухтури беморхона  Бахтиёр Назаров иброз дошт,  беморхона  аз се шуъба иборат буда, ба беморон хизмати тиббӣ мерасонад. Бемории силро асосан бемории иҷтимоӣ унвон мекунанд ва баъди беҳтар гардидани сатҳи зиндагии сокинони мамлакат ва таваҷҷуҳи хосса зоҳир намудани Ҳукумати Ҷумҳурии Тоҷикистон ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон нисбат ба солимии сокинон мувофиқи оморҳои расмӣ сатҳи беморӣ паст гардидааст.
Дар беморхонаи мазкур  шумораи табобатгирандагон дар ҳоли афзоиш аст ва табибон муроҷиати зиёди беморонро аз беҳтар гардидани шароити беморхона унвон мекунанд.