Пешвои миллат нуздаҳумин солгарди Рӯзи ваҳдати миллиро ба сокинони бонангу номус ва сарбаланди ноҳияи Ванҷ табрик намуд

Душанбе, 25.06.2016. /АМИТ «Ховар»/. Тавре иттилоъ дода будем, имрӯз сафари кории Асосгузори сулҳу ваҳдати миллӣ- Пешвои миллат,  Президенти Ҷумҳурии Тоҷикистон муҳтарам Эмомалӣ Раҳмон ба Вилояти Мухтори Кӯҳистони Бадахшон аз ноҳияи Ванҷ оғоз гардид.
Пешвои миллат дар оғози суханронӣ санаи сарҷамъиву баҳамоии миллати сарбаланду сулҳдӯстамон- нуздаҳумин солгарди Рӯзи ваҳдати миллиро ба сокинони бонангу номус ва сарбаланди ноҳияи Ванҷ ва деҳоти Язғуломро самимона табрик гуфта, барояшон саломатӣ ва саодати рӯзгорро орзу намуд.
Ба таъкиди Роҳбари кишвар ноҳияи Ванҷ дар натиҷаи дастгирии доимии давлату Ҳукумати мамлакат, иқдомоти ватандӯстонаи сокинону соҳибкорон ва шахсони ободкор чун дигар минтақаҳои кишвар, хусусан, дар давраи омодагӣ ба таҷлили ин ҷашни муқаддаси миллӣ боз ҳам ободу зеботар гардида истодааст.
«Соҳибистиқлолии кишвар дар таърихи давлатдории миллӣ ва сарнавишти халқамон оғози марҳалаи нави эҳёву гиромидошти арзишҳои таърихиву фарҳангии миллӣ маҳсуб гардида, таъмини сулҳу суботи комил заминаи устувори пешрафти тамоми соҳаҳои ҳаёти мардуми мо мебошад.
Водии зебоманзари Язғулом натанҳо бо табиати дилписанд ва кӯҳҳои осмонбӯс, балки бо мардуми боғуруре, ки садсолаҳо суннату анъанаҳои неки миллӣ ва арзишҳои гаронбаҳои мардуми куҳанбунёди моро ҳифз кардаанд, шуҳрат дорад»,-иброз намуд Асосгузори сулҳу ваҳдати миллӣ.
Президенти кишвар дар фарҷоми суханронӣ ҳамаи мардуми меҳмоннавозу сарбаланди ноҳияи Ванҷ, аз ҷумла сокинони деҳоти Язғуломро ба ифтихори 25-умин солгарди истиқлолияти кишвари маҳбубамон  Тоҷикистон ва Рӯзи ваҳдати миллӣ табрик гуфта, барои пазироии самимӣ изҳори ташаккур намуд.