Рашту Сангвору Лахш Ваҳдати миллиро ҷашн гирифтанд

Душанбе, 25.06.2016. /АМИТ «Ховар»/. Дирӯз дар марказҳои ноҳияҳои Рашт, Сангвор, ва Лахш бахшида ба рӯзи Ваҳдати миллӣ маҷлисҳои тантанавӣ баргузор гардид, ки дар он фаъолон, собиқадорон меҳмонон ва ҷавонон фаъолона иштирок намуданд.
Роҳбарони ноҳияҳои мазкур сокинони ноҳияҳо ва меҳмононро бо ин рӯзи таърихӣ табрик намуда, барои пойдорӣ, оромию осудагии кишвар ва чун гаҳвараки чашм нигоҳ доштани Ваҳдати миллӣ ва Истиқлолияти давлатии Ҷумҳурии Тоҷикистон суханронӣ намуданд.
Дар чорабинӣ зикр гардид, ки дар душвортарин лаҳзаҳои сарнавиштсози миллат фарзанди барӯманд ва номбардори миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба майдон омаду ватану хоку оби сарзамини бобоигиямонро ҳифз кард ва сулҳу якдигарфаҳмиро барқарор намуд. Ҳамарўза мо тариқи расонаҳои хабарӣ шоҳиди он мегардем, ки бештаре аз давлатҳои дунё ба доми фиреби давлатҳои абарқудрат, ҳизбу ҳаракатҳо ва ташкилотҳои террористию экстремистӣ афтода, мустақилияти хешро аз даст дода истодаанд.  Зимни суханронӣ аз ҷавонон даъват ба амал оварданд, ки барои ҳифзи ватани азизамон ва оромию осудагии сокинон дар атрофи Пешвои миллат сарҷамъ гардида, кишварамонро аз амалҳои ноҷавонмардонаи хиёнаткорон ҳифз намоем.
Дар арафаи ҷашни Ваҳдати миллӣ дар марказҳои ин ноҳияҳо намоиши ҳунарҳои мардумӣ ва ярмарка-фурӯши маҳсулоти кишоварзӣ ташкил гардид. Ҳамчунин ба маъюбону ятимон ва ниёзмандон кумакҳои пулӣ расонида шуд.
Санъаткорони шуъбаҳои фарҳанги ноҳияҳо бо барномаи консертӣ ва ҳазлу шӯхиҳои ҳаҷвнигорӣ хотири сокинонро болида гардониданд.