Спитамен: Оилаи Олимовҳо аз ҷамоати Т. Ӯлҷабоев оилаи беҳтарин эълон гардид

Душанбе, 08.06.2016 /АМИТ «Ховар»/. Дар ноҳияи Спитамен даври минтақавии Мусобиқаи ҷумҳуриявӣ ҷамъбаст шуд ва беҳтаринҳо ба даври вилоятӣ роҳхат гирифтанд. Бино ба иттилои комиссияи ноҳиявӣ дар даври ноҳиявии мусобиқа  намояндагони 7 ҷамоат иштирок намуданд. Мутобиқи шартҳои пешниҳодшуда оилаи Олимовҳо аз ҷамоати Т. Ӯлҷабоев оилаи беҳтарин, хонаи Обидҷоновҳо аз ҷамоати шаҳраки Нов хонаи беҳтарин, маҳаллаи Бобоҷон Ғафурови ҷамоати Т. Ӯлҷабоев маҳаллаи беҳтарин, деҳаи Саидқӯрғони ҷамоати деҳоти Истиқлол деҳаи беҳтарин, ҷамоати шаҳраки Нов ҷамоати беҳтарин дониста шуданд.
Ёдовар мешавем, ки ин мусобиқа ба ҷашни 25-солагии Истиқлолияти давлатии Ҷумҳурии Тоҷикистон бахшида шуда, бо амри Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои муайян кардани оилаи намунавӣ, хонаи намунавӣ, деҳа, маҳалла, деҳот, шаҳрак, ноҳия, шаҳр, вилоят ва мақомоти марказии ҳокимияти давлатии беҳтарин эълон гардидааст ва марҳалаҳои он имрӯзҳо дар шаҳру ноҳияҳои мамлакат идома доранд.