Судяи суди ноҳияи Рӯдакӣ ба гирифтани беш аз 100 ҳазор доллари амрикоӣ ҳамчун пора айбдор дониста мешавад

Июнь 24, 2016 15:02

Душанбе, 24.06.16. /АМИТ «Ховар»/. Аз ҷониби Агентии назорати давлатии молиявӣ ва мубориза бо коррупсияи Ҷумҳурии Тоҷикистон судяи Суди ноҳияи Рӯдакӣ Искандар Саидзода Туйчӣ дастгир карда шуд.
Тавре ки ба АМИТ «Ховар» аз маркази матбуоти агентии мазкур хабар доданд, номбурда  ҳамчун шахси мансабдори вазифаи давлатии Ҷумҳурии Тоҷикистонро ишғол намуда, ҳангоми баррасии парвандаи ҷиноятӣ бо айбдории шаҳрвандон «А» ва «Б» дар содир намудани ҷинояти дар моддаи 247 қисми 4 банди «б» Кодекси ҷиноятии Ҷумҳурии Тоҷикистон, бо мақсади гирифтани пора, бо ваъдаи пуштибонии умумӣ дар раванди баррасии судии парвандаи ҷиноятӣ, дар утоқи кории худ, аз судшавандагон «А» ва «Б» сараввал маблағи 2500 доллари амрикоиро шахсан ба сифати пора талаб намуда, гирифт. Бар замми ин, дар муддати тахминан ду ҳафтаи минбаъда, судя Саидзода Искандар Туйчӣ зимни баррасии парванда, дар ду мавриди дигар боз бо ваъдаи пуштибиноии умумӣ дар ҷараёни баррасии судӣ аз судшавандагон «А» ва «Б» ба сифати пора маблағи 2000 доллари амрикоӣ ва 5000 доллари амрикоӣ шахсан талаб намуда, дар утоқи кории худ аз номбурдагон ҷамъ 7000 доллари амрикоиро шахсан гирифт. Инчунин тахминан аввалҳои моҳи апрели соли 2016 судя Саидзода Искандар Туйчӣ зимни баррасии ҳамин парвандаи ҷиноятӣ, кирдорҳои қасдонаи ҷинояткоронаи худро идома дода, зери таҳдиди таъйини ҷазои маҳрум сохтан аз озодӣ маблағи 50000 доллари амрикоиро дар утоқи кории худ аз судшавандагон «А» ва «Б» гирифта, бо ҳукми суди ноҳияи Рӯдакӣ нисбат ба судшавандагон «А» ва «Б» ҷазои ғайриҳабсӣ, яъне ҷазо дар намуди ҷарима татбиқ кард. Судя Саидзода И.Т. аз маблағҳои пулии гирифтааш қонеъ нашуда, аз судшавандагони мазкур  боз 50 000 доллари амрикоӣ талаб намуд. Оид ба ҳолати мазкур 17 июни соли 2016 нисбат ба судяи Суди ноҳияи Рӯдакӣ Саидзода Искандар Туйчӣ  барои дар маҷмӯъ гирифтани яксаду ёздаҳ ҳазор доллари амрикоӣ бо моддаи 319 қисми 4 банди «б» Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, айни замон тафтиши пешакӣ бо парвандаи ҷиноятӣ идома дорад.

Июнь 24, 2016 15:02

Хабарҳои дигари ин бахш

Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд
Кишоварзони ноҳияи Зафаробод дар 120 гектар картошкаи барвақтӣ кишт менамоянд
Дар Агентии содироти Тоҷикистон бо намояндагони Агентии назорати давлатии молиявӣ ва мубориза бо коррупсия вохӯрӣ доир шуд
Ба кишоварзони ноҳияи Деваштич барои парвариши картошка ва тухмиҳои хушсифат тавсияҳо дода шуд
Дар ноҳияи Спитамени вилояти Суғд кишти чигит оғоз ёфт
Дар Донишгоҳи техникии Тоҷикистон вобаста ба меъморӣ ва шаҳрсозӣ конференсияи илмӣ-амалӣ доир шуд