Султон Мирзошоев аз олам даргузашт

Душанбе, 08.06.2016. /АМИТ «Ховар»/. Шаби  7 июни  соли равон дар шаҳри Душанбе Султон Мирзошоев баъди бемории кӯтоҳ дар синни 84-солагӣ аз олам даргузашт. Тавре пайвадони ӯ  ба АМИТ «Ховар» хабар доданд, имрӯз марҳум дар яке аз қабристонҳои пойтахт ба хок супорида мешавад.
Султон Шарипович Мирзошоев 9 январи соли 1932 дар деҳаи Ғарғараи ноҳияи Данғара  таваллуд шудааст. Ӯ яке аз ходимони намоёни давлатии Тоҷикистон буда, баъди хатми Донишкадаи омӯзгории шаҳри Кӯлоб ва Мактаби олии ҳизбӣ дар шаҳри Маскав аз соли 1960 то соли 1990 дар вазифаҳои котиби якуми КМ Комсомоли Тоҷикистон, нозири (инспектори) КМ ҲКТ, раиси Кумитаи давлатии кинематография, вазири фарҳанги Тоҷикистон, намояндаи домии Шӯрои вазирони Тоҷикистон дар назди Шӯрои вазирони собиқ СССР дар Маскав, котиби якуми кумитаи ҲКТ дар собиқ вилояти Кӯлоб кор кардааст. Султон Мирзошоев аввалин роҳбари Дастгоҳи иҷроияи Сарвари давлати Тоҷикистон (1993-1994) буд. Баъдан, то дами ба нафақа рафтанаш ба ҳайси директори Маҷмаи давлатии «Кохи Ваҳдат» кор кардааст. Фаъолияти пурсамар ва гуногунҷабҳаи ӯ бо ордени «Дӯстӣ», унвони фахрии «Корманди шоистаи Тоҷикистон» ва дигар мукофотҳои давлатӣ қадрдонӣ карда шудааст.
Султон Мирзошоев узви Иттифоқи нависандагони Тоҷикистон ва муаллифи китобҳои «Борис Кимёгаров», «Роҳи кинои тоҷик», «Бозгашти хотира», «Сулҳофар» ва ғайраҳо мебошад.
АМИТ «Ховар» ба пайвандон ва наздикони марҳум ҳамдардии амиқ изҳор менамояд.