«Таҳкими худшиносӣ ва тафаккури миллӣ бояд тарғибу ташвиқ шавад»-Эмомалӣ Раҳмон

Душанбе, 27. 06.2016/АМИТ «Ховар»/. Ғояи ваҳдати миллӣ ва сулҳу субот дар як марҳалаи муҳимму тақдирсози таърихи кишварамон ҳамчун омили муттаҳидкунандаи ҷомеа нақши муассиру арзандаи худро ба анҷом расонид. Ва акнун замони он фаро расидааст, ки ин падидаи муттаҳидсози миллат дар байни сокинони мамлакат, аз ҷумла наврасону ҷавонон ба сифати воситаи муҳимми таҳкими худшиносӣ ва тафаккури миллӣ ҳарчи бештар тарғибу ташвиқ карда шавад. Ин нукта  дар Паёми табрикии Пешвои миллат ба ифтихори Рӯзи Ваҳдати миллӣ ироа гардидааст.
Президенти кишвар дар идомаи Паём зикр намудаанд, ки:  «Имрӯз кишвари мо аз файзу баракати истиқлолияти давлатӣ ва ваҳдати миллӣ дар шоҳроҳи рушди устувор қарор дошта, сатҳу сифати зиндагӣ, маърифату ҷаҳонбинӣ ва эҳсоси худшиносиву ифтихори миллии ҳамватанони мо торафт таҳкиму густариш меёбад. Бори дигар иброз медорам, ки пешрафту пирӯзиҳои то имрӯз ноилшудаамон ба туфайли соҳибистиқлолӣ ва ваҳдати миллӣ ба даст омадаанд.
Аз ин лиҳоз, ҳифзи дастовардҳои истиқлолият, таҳкими пояҳои давлатдории миллӣ ва кӯшиш ба хотири густариши ваҳдату ҳамдигарфаҳмӣ дар ҷомеа вазифаи ҳар як фарди худогоҳу ватандӯсти мамлакат мебошад».