Ваҳдати миллӣ — гавҳари ягонаи бунёди ҷомеаи солиму созанда

Душанбе, 24.06.2016 /АМИТ «Ховар»/. Ба ифтихори Рӯзи ваҳдати миллӣ миёни сарбозони қисми низомии 5453 қӯшунҳои дохилии Вазорати корҳои дохилӣ таҳти унвони «Ваҳдат — гавҳари ягонаи бунёди ҷомеаи солиму созанда» чорабинии фарҳангиву маърифатӣ доир гардид.  Дар  чорабинӣ Аббос Саймуддинов  сардори Раёсати ҷавонон, варзиш ва сайёҳии шаҳри Душанбе, Маҳмадулло Наимов  мудири шуъбаи таблиғоти ҲХДТ, Нурмаҳмад Бобоев  сардори шуъба оид ба корҳои сиёсӣ-тарбиявии Раёсати қӯшунҳои дохилии ВКД оид ба масъалаҳои нақши Пешвои миллат, Президенти ҷумҳурии Тоҷикистон муҳтарам Эмомалӣ Раҳмон дар таҳким ва нигоҳдошти арзишҳои Ваҳдату ягонагӣ, устувориву рушди самтҳои гуногуни соҳаҳои иқтисодиёту иҷтимоиёт дар заминаи беҳбуд бахшидани ҳаёти осоишта барои тамоми мардуми кишвар сухан гуфтанд.
Зикр гардид, ки Ваҳдати миллӣ гавҳари ягонаи бунёди ҷомеаи солиму созанда мебошад.
Дар чорабинӣ як зумра сарбозону афсарони шуҷоъ ба хотири саҳми арзанда ва хизматҳои намунавию ибратбахш дар сафи Қувваҳои мусаллаҳ бо сипосномаю туҳфаҳои хотиравии Раёсати ҷавонон, варзиш ва сайёҳии шаҳри Душанбе қадрдонӣ гардиданд.