Ваҳдати миллӣ- рукне аз сарнавишти давлати соҳибистиқлол

Душанбе, 28.06.2016 /АМИТ «Ховар»/.  Бахшида ба таҷлили 19-умин солгарди Рӯзи Ваҳдати миллӣ дар   осорхонаи вилояти Қурғонтеппа  ба номи «Авасто» бо иштироки донишҷӯёни факултаи таърих ва ҳуқуқи Донишгоҳи давлатии Қурғонтеппа ба номи  Носири Хусрав, омӯзгорону хонандагони муассисаи таҳсилоти миёнаи иловагии вилоят ва наврасону ҷавонон зери унвони «Ваҳдати миллӣ- рукне аз сарнавишти давлати соҳибистиқлол» суҳбат доир гардид.
Тавре аз хадамоти матбуотии вилояти Хатлон иттилоъ доданд, дар чорабинии мазкур  директори осорхона Гулистон Пиракова бахшида ба таҷлили 19-солагии Рӯзи Ваҳдати миллӣ зикр намуд, ки маҳз кӯшишҳои доимӣ ва пайгиронаи Асосгузори сулҳу Ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буд, ки 27 июни соли 1997 Созишномаи умумии истиқрори сулҳ ва ризоияти миллӣ дар шаҳри Маскав бо иштироки намояндагони як қатор кишварҳо ва ташкилотҳои байналмилалӣ ба имзо расид, ки он роҳи сулҳи бебозгаштро дар кишвари мо таъмин намуд.
Инчунин дар ҷаласа зикр гардид, ки мақсад аз баргузории суҳбату вохӯриҳо-ин  бедор намудани ҳисси баланди миллӣ, худогоҳиву худшиносӣ ва бархурдор намудани ҷавонон аз таъриху тамаддуни пурғановати гузаштаи миллати худ мебошад.
Дар фароварди чорабинӣ хонандагони муассисаи таҳсилоти миёнаи иловагии вилоят дар васфи Ватан-модар, Ваҳдат Тоҷикистон, Истиқлолият бо  эҳсосоти баланди ватандорӣ порчаҳои шеърӣ қироат намуданд.