Варзоб: Оилаи Сангиновҳо беҳтарин дониста шуд

Душанбе, 08.06.2016 /АМИТ «Ховар»/. Мутобиқи шартҳои Мусобиқаи ҷумҳуриявӣ оилаи Сангиновҳо аз деҳаи Ғажнеи  ноҳияи Варзоб  дар даври минтақавӣ  оилаи беҳтарин  дониста шуд. Дар ин бора ба АМИТ «Ховар» аз мақомоти иҷроияи ҳокимияти давлатии ноҳияи Варзоб хабар доданд.
Сардори оила Шомаҳмад Сангинов дар суҳбат ба хабарнигорон изҳор дошт, ки муваффақияти ҳар як оила дар тарбияи дурусти фарзандон, маълумотнокии онҳо, иҷрои корҳои хайру савоб, худшиносию ватандӯстӣ ва ифтихори миллӣ, ободонию тозакорӣ таҷассум мегардад. «Ин ҳама амалҳо ва сифатҳоеанд, ки Пешвои миллат муҳтарам Эмомалӣ Раҳмон зимни ҳар суханронии худ ба аҳолии мамлакат талқин менамоянд,- гуфт ӯ.
Дар деҳаи Ғажне нимпайкараи Қурбон Сангинӣ гузошта шудааст, ки аз гузаштагони барӯманди ин хонадон буда, дар Ҷанги дуюми ҷаҳонӣ иштирок кардааст. Ӯ  солҳои 50-70-уми қарни гузашта дар дараи Варзоб ва берун аз он чун шоир ва рӯзноманигори ҳақиқатнигор ном бароварда буд. «7 майи соли 2015 мактаби тахсилоти миёнаи умумии №2-и ноҳияи Варзоб ба номи Сангинов Курбон монда шуд, ки барои мо наберагон ва авлод ифтихор аст», — навиштааст дар саҳифаи худ дар Фейсбук узви ин хонадон, номзади илмҳои ҳуқуқ, дотсент, мудири кафедраи факултети ҳуқуқшиносии Донишгоҳи миллии Тоҷикистон Дониёр Сангинов.
Деҳаи Ғажне дар ҷамоати деҳоти Варзоб-Қалъа аз калонтаринҳо маҳсуб ёфта, дар он 1502 хоҷагӣ умр ба сар мебаранд. Ҳамаи онҳо  дар Мусобиқаи ҷумҳуриявӣ фаъолона ширкат намуданд.
Дар ноҳияи Варзоб даври минтақавии Мусобиқаи ҷумҳуриявӣ ҷамъбаст шуд. Бино ба иттилои комиссияи ноҳиявӣ,  дар даври ноҳиявии мусобиқа  намояндагони 7 ҷамоат (6 ҷамоати деҳот ва 1 ҷамоати шаҳрак)  иштирок намуданд.
Ёдовар мешавем, ки ин Мусобиқа ба ҷашни 25-солагии Истиқлолияти давлатии Ҷумҳурии Тоҷикистон бахшида шуда, бо амри Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон № АП-681 аз 24 феврали соли 2016 барои муайян кардани оилаи намунавӣ, хонаи намунавӣ, деҳа, маҳалла, деҳот, шаҳрак, ноҳия, шаҳр, вилоят ва мақомоти марказии ҳокимияти давлатии беҳтарин эълон гардидааст ва марҳалаҳои он имрӯзҳо дар шаҳру ноҳияҳои мамлакат идома доранд.