Вохӯрии кормандони осорхонаи Хатлон бо мактаббачагони лагери «Соҳил»

Душанбе, 30.06.2016 /АМИТ «Ховар»/. Кормандони осорхонаи таъриху кишваршиносии вилояти Хатлон ба номи «Авасто» дар истироҳатгоҳи бачагонаи  Ҷамоати деҳоти  Қизилқалъаи ноҳияи Хуросон бо мураббиён ва зиёда аз 81 нафар мактаббачагони лагери «Соҳил» дар мавзӯи «Дубора месозамат Ватан» вохӯрӣ баргузор намуданд.
Тавре аз хадамоти матбуотии вилояти Хатлон иттилоъ доданд, дар  вохӯрӣ кормандони осорхона бо бошандагони лагери «Соҳил» оид ба  мафҳумҳои Истиқлолияти давлатӣ, Ваҳдати миллӣ ва  таърихи гузаштаи халқи тоҷик суҳбати озод  доир намуданд.
Дар ҷараёни суҳбат кормандони осорхона барои бошандагони лагери «Соҳил» намоиши сайёри нигораҳоро ташкил намуданд. Дар намоиш оид ба нигораҳои гилине, ки ба асри IX мелодӣ мутааллиқанд, маълумот доданд.
Баргузории ин гуна вохӯриҳо дар байни мактаббачагон дар тарбияи ахлоқиву маънавии онҳо саҳми босазо хоҳад гузошт.