Абдуфаттоҳи Ғоиб, сардори Хадамоти гумрук: «Русия ҳамоно шарики асосии тиҷорати хориҷии Тоҷикистон боқӣ мемонад»

Душанбе, 20.07.2016 /АМИТ «Ховар»/. Русия ҳамоно яке аз шарикони асосии тиҷорати хориҷии Ҷумҳурии  Тоҷикистон боқӣ монда, беш аз 31% ҳаҷми маҳсулоти воридотӣ ба Ҷумҳурии Тоҷикистон ба Русия рост меояд.
Назар ба иттилои сардори Хадамоти гумруки назди Ҳукумати  Ҷумҳурии Тоҷикистон Абдуфаттоҳи Ғоиб, дар ин раддабандӣ кишвари ҳамҷавори Тоҷикистон,  Чин бо зиёда аз 30%-и ҳаҷми маҳсулоти  воридотӣ ба Тоҷикистон зинаи дуюмро касб менамояд. Инчунин, ҳаҷми маҳсулоти воридотии  кишварҳои дигари хориҷӣ,  назири Қазоқистон беш аз 15 %, Туркия ва Туркманистон беш аз 3 %,  Эрон 2,2%, Покистон  ва Ӯзбекистон беш аз  1% -ро ташкил дода,  0,6% ҳаҷми маҳсулоти воридотӣ ба кишварамон  ба Имороти Муттаҳидаи Араб рост меояд.
Дар ин давра асосан аз кишварҳои дар боло зикршуда ба Тоҷикистон таҷҳизоти технологию барқӣ, оҳан ва маҳсулоти он, маҳсулоти нафтӣ, гандум, оксиди алюминий (глинозем), гази моеъ, равғани растанӣ, чӯбу тахта, маҳсулоти пластикӣ, нуриҳои минералӣ, шакар, орд ва гӯшти парранда  ворид карда шудааст.