Барои кадрҳои роҳбарикунанда курсҳои такмили ихтисос ташкил карда шуд

Душанбе, 25.07.2016. /АМИТ «Ховар»/.   Дар Вазорати меҳнат, муҳоҷират ва шуғли аҳолии Ҷумҳурии Тоҷикистон ҷаласаи хотимавии Лоиҳаи GIZ GOPA «Дастгирии ҷараёни ислоҳоти соҳаи таҳсилоти касбӣ дар Тоҷикистон-ҷузъи таҳсилоти ибтидоии касбӣ» доир гардид.
Зикр кардан бамаврид аст, ки дар доираи ин лоиҳа  дар Литсейи касбии техникии ноҳияи Тоҷикобод, Литсейи касбии хизмат ва туризми шаҳри Душанбе, Литсейи касбии техникии шаҳри Панҷакент, Литсейи касбии хизмати шаҳри Хуҷанд ва Литсейи касбии  политехникии шаҳри Душанбе барои ихтисосҳои фермер- соҳибкор, нонпаз- қаннод, васлгари барқии таҷҳизоти баландшиддат, мошинисти дастгоҳҳои пармакунӣ ва болобарандаи нефту  газ дараҷаи 4, ташкилотчии сайёҳӣ, коркардкунандаи матоъ заминаҳои моддию техникӣ ташкил карда шуда, утоқҳо бо таҷҳизоти таълимӣ ва ашёву аёниятҳои дарсӣ таъмин карда шуданд.
Ҳамзамон дар доираи ин лоиҳа мутахассисони маҳаллӣ ва хориҷӣ барномаҳоро барои тайёр намудани тренерҳо  ва гузаронидани такмили ихтисос  омода намуда, аз рӯи барномаи тасдиқшуда 4 нафар директорон ва 9 нафар муовинони директори муассисаҳои таҳсилоти ибтидоии касбӣ курси такмили ихтисоси 18- рӯза гузаштанд. Бояд гуфт, ки  дар давоми солҳои 2015-2016 чунин курсҳои такмили ихтисос барои тамоми кадрҳои роҳбарикунанда, методистон, кормандони муҳандисию омӯзгории муассисаҳои таҳсилоти ибтидоии касбӣ ройгон гузаронида шуданд.