Дар Файзобод Форуми занони соҳибкори минтақаи Рашт баргузор гардид

Файзобод, 21.07.2016. /АМИТ «Ховар»/.  Дирӯз дар назди Қасри фарҳанги ноҳияи Файзобод Форуми занони соҳибкори минтақаи Рашт баргузор гардид, ки дар он занони соҳибкори ноҳияҳои Лахш, Тоҷикобод, Рашт, Нуробод, Сангвор, Файзобод ва шаҳри Роғун фаъолона иштирок намуда, маҳсулоти истеҳсол намудаашонро аз қабили 31 намуд маҳсулоти ширӣ, асали тоза, 34 намуди гиёҳҳои шифобахши кӯҳистон, шарбати мева, ҳунарҳои миллӣ ва хӯрокҳои миллиро бо нархи дастрас ба фурӯш гузоштанд.
Дар айни замон аз ҳисоби Барномаи ҷонибдории инкишофи иҷтимоии манотиқи кӯҳистони хазинаи Оғохон зиёда аз 600 нафар занони соҳибкор дар минтақаи Рашт ба фаъолияти соҳибкорӣ машғул мебошанд, ки вобаста аз намуди фаъолияти истеҳсолияшон дар як моҳ аз 500 то 1000 сомонӣ фоида ба даст меоранд.
Соҳибкорзани нурободӣ Сайбону Шӯхиева иброз дошт: «имрӯз занони минтақаи Рашт бо тафаккури зеҳнӣ ба сарфаи буҷаи оила, камхарҷ гузаронидани чорабиниҳои оилавӣ мукаммал шуда, барои дарёфти имкониятҳои соҳибкорию истеҳсолии нав кӯшиш намуда истодаем. Инчунин мо соҳибкорзанон дар самти коркарди пашм, шир, меваю сабзавот ва занбӯри асал фаъолият намуда,  занони дигарро низ ба фаъолияти соҳибкорию ғанӣ гардонидани буҷаи оилавӣ ташвиқу тарғиб менамоем».