Дар Хуҷанд Мусобиқаи теннисбозони наврас баргузор гардид

Душанбе, 22.07.2016. /АМИТ «Ховар»/. Дар мактаб-Гимназияи №4 шаҳри Хуҷанд  мусобиқаи кушоди шаҳрӣ оид ба тенниси рӯи миз, байни писарон ва духтарони солҳои таваллудашон 2003 ва хурд бахшида ба 25  солагии Истиқлолияти давлатии Ҷумҳурии Тоҷикистон баргузор гардид.
Дар мусобиқа зиёда аз 80 нафар наврасону ҷавонон иштирок намуданд, ки аз ин шумора 16 нафарашонро духтарон ташкил медиҳанд.
Байни духтарон аз рӯи нишондоди натиҷаҳои мусобиқа мақоми теннисбози беҳтаринро Сабрина Муродӣ соҳиб гашта, Меҳрона Ҳакимова ва Мадина Юлдошова ҷойҳои ифтихории дуюму сеюмро ишғол намуданд. Байни ҷавонписарон бошад, Далерзода Муҳаммадазим тамоми ҳарифони худро мағлуб намуда, ҷойи аввалро соҳиб шуд. Ҷойҳои баъдинаи ифтихориро Эраҷ Холиқов ва Сӯҳроб Замирӣ ба даст оварданд.
Ба ғолибони мусобиқа медал ва ифтихорномаҳо супорида шуданд.