Дар Шаҳринав майдони кишти сабзавот васеъ гардид

Шаҳринав, 28.07.2016. /АМИТ «Ховар»/. «Айни ҳол дар хоҷагиҳои ноҳияи Шаҳринав ҷамъоварии ғалла, мева ва сабзавот идома дошта, кишти такрорӣ дар арафаи анҷомёбист», — иброз дошт раиси ноҳияи Шаҳринав Нусратулло Аюбзода зимни нишасти хабарӣ.
Дар нимсолаи аввал ба хориҷи кишвар беш аз 1 ҳазору 875 тонна пиёз, 70 тонна олу, 12 тонна гелос фиристода шуд. Дар ҳамаи категорияи хоҷагидорӣ 2 ҳазору 59 тонна картошка истеҳсол карда шуд, ки аз он 1949 тонна ба хоҷагиҳои кишоварзӣ рост меояд. Дар ҳудуди ноҳияи Шаҳринав 2 ҳазору 382 гектар майдони боғу токзор мавҷуд аст, ки аз он 1995 гектараш ҳосилдиҳанда мебошад.
Боиси хурсандист, ки чанде пеш бо ибтикори соҳибкорон Исроил Назаров ва Абудсаттор Одинаев дар мавзеи Мулло Шодии ҷамоати Акрам Ҳасанов тавассути пойгоҳи обкашӣ дар масоҳати беш аз 20 гектар об бароварда шуд.
Кишоварзони ноҳияи Шаҳринав бо мақсади боз ҳам бештар саҳм гузоштан дар таъмини амнияти озуқаворӣ майдони кишти сабзавотро боз 200 гектари дигар афзун намуданд.
Мавриди зикр аст, ки соҳаи занбӯрпарварӣ дар ҳудуди ноҳияи Шаҳринав сол то сол ривоҷу равнақ меёбад. Ҳамин сол 62 оилаи занбӯри асал зиёд гардид. Дар давраи ҳисоботӣ шумораи занбӯри асал 3 ҳазору 274 оиларо ташкил медиҳад.