М. Лутфуллоев: Истиқлолият ҳамчун арзиши маънавӣ ба илми педагогика ворид карда мешавад

Душанбе. 07.07.2016 /АМИТ «Ховар»/. Нашриёти «Сифат» китоби нави Муҳаммадулло Лутфуллоев, академики Академияи таҳсилоти Тоҷикистонро таҳти унвони «Тулӯи хуршеди истиқлол ва масъалаҳои тарбия», ки   ба 25  солагии Истиқлолияти давлатии Ҷумҳурии Тоҷикистон бахшида шудааст,  ба табъ расонд.
Бояд зикр намуд, ки дар  илми педагогика  солиёни зиёд ҳашт арзиш асосӣ дониста мешуд: инсон, сулҳ, замин, ватан, хонавода (оила), касбу кор (меҳнат), илму дониш, фарҳанг. Чанд сол пеш ба ин арзишҳо устод Муҳаммадулло Лутфуллоев арзиши нуҳум —  ишқу муҳаббатро илова карда буд (асарҳои «Шарафномаи миллат», Душанбе, 2003; «Педагогикаи миллии халқи тоҷик», Душанбе, 2015).
Инак, Муҳаммадулло Лутфуллоев  Истиқлолиятро  чун даҳумин арзиши маънавӣ барои ворид намудан ба илми педагогика  пешниҳод  менамояд, ки  идеяи нав аст.
Забони асар  содда, равон ва фаҳмо буда, аз панҷ боб иборат аст ва пурра  ба масъалаи дӯст доштани Ватан, расидан ба қадри неъмати бебаҳои он — истиқлолият ва дигар масъалаҳои тарбия бахшида шудааст.