Маҳфили адабии «Дар суҳбати адиб» бо ширкати Саттор Турсун

Душанбе, 25.07.2016. /АМИТ «Ховар»/. Маҳфили навбатии «Дар суҳбати адиб»  22 июл дар толори «Ошёни булбулон»-и Китобхонаи миллӣ бо иштироки яке аз маъруфтарин адибони муосир, Нависандаи халқии Тоҷикистон Саттор Турсун баргузор гардид.
Директори Китобхонаи миллии Тоҷикистон, профессор Сайфиддин Назарзода иброз намуд: «Бисту панҷ сол аст, ки Тоҷикистони маҳбуби мо соҳибистиқлол ва мардуми шарифи кишвар соҳиби давлати озоду соҳибихтиёр буда, дар фазои Ватани азизамон хуршеди истиқлол партавафшонӣ мекунад ва бо нурҳои ҳаётбахши худ дилу нияти бунёдкоронаи моро, манзилу маъвои моро, имрӯзу фардоямонро мунаввар мегардонад. Ҳарчанд, ки Истиқлоли мо ҷавон аст, вале решаҳои он ба умқи таърихи пурифтихори халқамон мерасанд ва аз муборизаҳои фидокоронаи ҳазорон нафар фарзандони далеру қаҳрамони миллатамон, ки дар роҳи озодиву истиқлоли сарзамини аҷдодиамон ҷонфидоӣ кардаанд, шодоб гардидаанд».
Меҳмони маҳфил Cаттор Турсун дар мавзӯи Истиқлолият суханронӣ намуда, зикр кард, ки маҳз Истиқлолият Тоҷикистонро бо ҷаҳон ва ҷаҳонро бо Тоҷикистон пайванди ногусастанӣ ва ҳамешагӣ бахшид ва дарвозаҳои чаҳор самти олами бекаронро ба рӯяш боз намуд. Танҳо бо шарофати истиқлолияти давлатӣ мо тавонистем, ки аз бунбасти коммуникатсионӣ раҳоӣ бахшидани кишварамонро ҳадафи стратегии худ қарор диҳем ва бо заҳмати содиқонаи мардумамон ба сӯи ин ҳадаф босуръат пеш равем.
Дар нишаст миёни ширкаткунандагон ва меҳмони олиқадр баҳси пурҷӯш дар мавриди адабиёт ва ҳунар, нақши асарҳои адабӣ дар ташаккули ғояҳои истиқлолхоҳӣ ҷараён гирифт.