Нақши расонаҳои хабарӣ дар инъикоси ҳуқуқҳои инсон

Душанбе, 11.06.2016. /АМИТ Ховар/. Намояндагони воситаҳои ахбори оммаи кишвар дар доираи баргузории  давраи омӯзишӣ дар мавзӯи «Масоили марбут ба ҳуқуқи инсон, хатарҳои муҳоҷират ва савдои одамон», ки имрӯз дар Душанбе оғоз ёфт, донишҳои худро мукаммал мегардонанд.
Давраи омӯзишии  мазкур бо ибтикори Созмони байналмилалии муҳоҷират  дар доираи  лоиҳаи Агентии рушди байналмилалии  Амрико оид ба шаъну этибор ва ҳуқуқҳо дар ҳамкорӣ бо Ҳукумати  Ҷумҳурии Тоҷикистон  гузаронида шуда, ҳадафаш боло бурдани  сатҳи фарогирии мавзӯи ҳуқуқҳои инсон, хатарҳои муҳоҷират  ва савдои одамон дар расонаҳои хабарӣ, баланд бардоштани сатҳи огоҳии  шаҳрвандон роҷеъ ба масоили зикршуда мебошад.
Дар давраи омӯзишӣ коршиносон ва мутахассисони Созмони байналмилалии муҳоҷират   ба намояндагони  воситаҳои ахбори омма  доир ба вазъи савдои одамон  ва ҳуқуқҳои инсон  дар ҷаҳон ва Тоҷикистон, роҳҳои ҷилавгирӣ аз ин зуҳуроти номатлуб,  нақши расонаҳои хабарӣ дар инъикоси ин мавзӯъ, инунин санадҳои миллӣ ва соҳавӣ дар самти муқовимат ба савдои одамон машғулиятҳои назариявию амалӣ мегузаронанд.