«Нозирони сабз»-и мактаби президентӣ дар озмун ғолиб омаданд

Хоруғ, 20.07.2016. /АМИТ«Ховар»/. Бо мақсади ташвиқу тарғиби тозагии муҳити зист дар миёни хонандагони макотиби шаҳр ва донишҷӯёни Донишгоҳи давлатии Хоруғ ба номи М.Назаршоев  озмун эълон шуда буд, ки натиҷаи он баъди се моҳ бо ширкати коршиносони риштаи экология ва кормандон  соҳаи маориф ҷамъбаст гардид.
Муовини сардори Раёсати муҳити зисти вилоят Фарҳод Мамадназарбеков гуфт, ки баъди эълони озмуни мазкур муҳити зисти шаҳр, хусусан соҳили рӯдхонаи Панҷ хеле тоза гардид. Мо дар саргаҳи оби Осиёи Марказӣ қарор дорем ва дар поёни оби ин рӯдхона садҳо нафар аз кӯдакону наврасон ва калонсолон дар фасли тобистон оббозӣ ва ё истироҳат мекунанд. Аз ин рӯ пок нигоҳ доштани оби рӯдхонаҳо вазифаи хурду калони вилояти мо ба шумор меравад.  Зимни тақдими мақоми аввал ба гурӯҳи  хонандагони мактаби президентӣ мавсуф гуфт, ки яке аз афзалиятҳои ин гурӯҳ аз гурӯҳҳои дигар нашри варақаҳои пурмазуни иттилоотӣ оид ба ҳифзи муҳити зист мебошад. Ҳамин таҷрибаро минбаъд бештар дар байни дигар макотиб низ паҳн кардан аз манфиат холӣ нахоҳад буд.
Ҳамин тариқ, мақоми аввалро хонандагони мактаби президентӣ, ҷойҳои дуввуму саввумро Донишгоҳи давлатии шаҳри Хоруғ ва хонандагони мактаби ба номи Давлаталӣ Шабдолов ишғол намуданд.