Пагоҳ ҲКТ бори нахуст дар Душанбе нишасти матбуотӣ баргузор мекунад

Душанбе, 22.07.2016. /АМИТ «Ховар»/. Пагоҳ дар Душанбе Ҳизби коммунисти Тоҷикистон дар қароргоҳи марказии ҳизб барои хабарнигорон нишасти матбуотӣ баргузор мекунад.
Тавре раиси ҲКТ Исмоил Талбаков ба АМИТ «Ховар» иттилоъ дод, чунин нишасти матбуотии ҳизби коммунист дар давоми даҳ солаи охир бори нахуст гузаронида мешавад. «Ба журналистон вазифаҳои тактикӣ-стратегии ҳизби коммунист барои панҷ соли оянда муаррифӣ карда хоҳад шуд», — гуфт И.Талбаков ва илова кард, ки: «Қабл аз нишасти матбуотӣ ҷаласаи Садорати ҳизби коммунист баргузор мешавад. Дар назар дошта шудааст, ки зимни ҷаласа аъзои Садорат ба Ҳукумати Ҷумҳурии Тоҷикистон изҳорот қабул мекунад».
Мувофиқи иттилои И.Талбаков изҳороти Садорати ҲКТ дар мавзӯи тақвият бахшидани ҳамкории судманд бо Ҳукумат баҳри ҳифзи музаффариятҳои соҳибистиқлолии Тоҷикистон қабул мегардад. «Ҳамчунин мо ба ҳамаи ҳизбҳои сиёсӣ барои барқарор кардани ҳамкории дуҷониба ва бисёрҷониба ба хотири ҳимояи манфиатҳои умумидавлатӣ ва умумимиллӣ муроҷиатнома қабул мекунем», — гуфт И.Талбаков, раиси ҳизби коммунисти Тоҷикистон.
Мавриди ёдоварист, ки дар анҷумани 32 ҲКТ Исмоил Талбаков ба ҷойи Ш.Шабдолов раиси ҳизби коммунист интихоб гардид. И.Талбаков изҳор карда буд, ки фаъолияти ҳизби коммунистро ҷоннок карда, Шӯрои ветеранҳои ҲКТ-ро таъсис медиҳад.