Ронандаи мошини «БМВ», ки писарбачаи 10-соларо пахш намуд, дастгир шуд

Душанбе, 11.07.2016. /АМИТ «Ховар»/. 9 июли  соли равон тахминан соати 15:10 мошини тамғаи номаълум ҳангоми ҳаракат дар шоҳроҳи «Душанбе-Ваҳдат»,  дар рӯ ба рӯи ҷамоати деҳоти Гулистон бехатарии ҳаракат дар роҳро таъмин карда натавониста, писарбачаи 10-солаи сокини ноҳияи Рӯдакиро пахш намуда, аз ҷойи ҳодиса фирор намудааст. Дар натиҷа пиёдагарди ноболиғ ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Тавре аз Вазорати корҳои дохилии ҶТ хабар доданд, ҳангоми гузаронидани чорабиниҳои фаврию ҷустуҷӯӣ кормандони милитсия ронандаи мошини тамғаи «БМВ», марди 22-солаи сокини ноҳияи Рӯдакиро дар робита ба ҳодисаи мазкур дастгир намуданд.
Корҳои тафтишотӣ оид ба ин воқеа идома доранд.