Ширкати «Барқи тоҷик» барои паст намудани сатҳи талафоти барқ системаи биллингро ҷорӣ менамояд

Душанбе, 03.08.2016. /АМИТ «Ховар»/.  «Баҳри ба роҳ мондани ҳисоби дурусти хароҷоти неруи барқ ШСХК «Барқи Тоҷик» то 1 июли соли равон дар 13737 адад воридаҳои истгоҳҳои трансформатории 6-10/0,4 кВт, ки дар тавозуни муштариён ва шабакаҳои барқӣ мебошанд, ҳисобгиракҳои электронӣ насб кард»,- зикр намуд дирӯз зимни нишасти матбуотӣ Мирзо Исмоилзода, раиси ШСХК «Барқи Тоҷик».
Мирзо Исмоилзода ҳамчунин илова намуд, ки бо мақсади дуруст ба роҳ мондани ҳисоби хароҷоти неруи барқ, 17573 адад  ҳисобгиракҳои барқии муштариён аз даруни ҳавлиҳо ва 32763 адад аз даруни хонаҳои  баландошёна ба ҷои намоён бароварда шуданд.
Ширкати «Барқи Тоҷик» дар ҳамкорӣ бо Хадамоти назорати давлатӣ дар соҳаи энергетика барои паст намудани сатҳи талафоти барқ чораҳои зарурӣ андешида, тасмим гирифтааст, ки дар шашмоҳаи охири соли равон дар шабакаҳои барқии шаҳрҳои Душанбе ва Хуҷанд системаи биллингро ҷорӣ намояд.