«Созандагони Ватан»: Аз рафтору гуфтори иштирокчиёни эътирозҳои Варшава маълум, ки онҳо фарсахҳо аз сиёсат дуранд

Душанбе, 24.09.2016. /АМИТ «Ховар»/. Дар  ҷаласаи Шӯрои Марказии  Ташкилоти ҷамъиятии ҷавонон «Созандагони Ватан» ҳодисаи  дар хориҷи кишвар саҳнасозӣ шудаи гурӯҳҳои хурди ифротӣ, ки зимни баромади намояндагони Ҷумҳурии Тоҷикистон дар дафтари САҲА сурат гирифтанд, мавриди  баррасӣ қарор дода шуд. Дар ҷаласа инчунин муроҷиатномаи Шӯро қабул гардид.

Дар муроҷиатнома намояндагони Ташкилоти ҷамъиятии ҷавонон «Созандагони Ватан» воқеоти рухдодаро қатъиян маҳкум намуда, баён доштаанд, ки  ин амали бо ном «паноҳандагони сиёсӣ» ё як гурӯҳи хурди ифротӣ рафтори ғайри қобили қабул ва ҳатто авбошона буда,  ба хотири ҳамчун қурбонии сиёсӣ ба намоиш гузоштани худ дар ҳамин росто соҳиб шудан ба шароити хубтари зиндагӣ дар кишварҳои хориҷӣ ва ҳимояи хоҷагони хориҷиашон роҳандозӣ гардид.

Аз  тарзи рафтору гуфтор ва шакли зоҳирии аксари иштирокчиёни эътирозҳои сохта баръало маълум аст, ки онҳо фарсахҳо аз сиёсат дуранд ва ба асли гуфтаҳои худ сарфаҳм намераванд. Рафтори онҳо аслан масали «Бузро чию хирманкубиаш чӣ»- ро пеши хотир меорад.

«Созандагони Ватан» бо таассуф иброз намудаанд, ки  давлатҳо ва ташкилотҳое, ки барои баргузории чунин намоишҳои сохта имкон фароҳам меоранд,  субъектҳои ҳуқуқи байналмилалие мебошанд, ки бояд дар боздошт ва мавриди ҷазо қарор додани ҳама гуна ифротгарову гурӯҳҳои ҷиноӣ, ки дар пайгарди ҷиноӣ қарор доранд, мусоидат намоянд ва ҳадалимкон  уҳдадориҳои байналмилалии худро риоя намуда, эҳтироми як давлати соҳибихтиёрро ба ҷо оваранд.

Дар ҷаласа инчунин зикр гардид, ки мардуми Тоҷикистон, бахусус ҷавонон, ки аксари аҳолиро ташкил медиҳанд, дар атрофи сиёсати пешгирифтаи Асосгузори сулҳу Ваҳдати миллӣ, Пешвои миллат муҳтарам Эмомалӣ Раҳмон муттаҳид гардида, минбаъд низ барои татбиқ намудани ормонҳои демократӣ, ободиву осудагӣ, сулҳу ваҳдат ва мубориза бо ҳама гуна қувваҳои ҷинояткорон талош хоҳанд кард.