50 ширкати чинӣ маҳсулоти худро ба намоиш мегузоранд

Душанбе, 27.10.2016/АМИТ «Ховар»/. 50 ширкати чинӣ дар намоишгоҳи молҳои содиротии ноҳияи мухтори Шинҷону Уйғури Чин, ки 30 октябр дар Маҷмааи давлатии «Кохи Борбад»-и Душанбе оғоз меёбад, маҳсулоти худро ба намоиш ва фурӯш мегузоранд.
Ҳадафи баргузории намоишгоҳ муаррифии молҳои ширкатҳои чинӣ ва таҳкими ҳамкории тиҷоратӣ байни Тоҷикистону Чин арзёбӣ мегардад.
Палатаи савдо ва саноати Ҷумҳурии Тоҷикистон ва департаменти тиҷоратии Ҳукумати ноҳияи мухтори Шинҷону Уйғури Чин аз созмондиҳандагони намоишгоҳ мебошанд.
Мукаммал Раҷабӣ, сухангӯи Палатаи савдо ва саноати Ҷумҳурии Тоҷикистон ба АМИТ «Ховар» итттилоъ дод, ки намоишгоҳ муддати се рӯз идома ёфта, дар доираи он дар Душанбе ҳамоиши тиҷоратии доираҳои соҳибкории Тоҷикистону Чин баргузор мегардад. Ҳамзамон дар Палатаи савдо ва саноати Тоҷикистон вохӯрии бонувони соҳибкори Тоҷикистону ноҳияи мухтори Шинҷону Уйғури Чин дар назар аст.