Ҳайати бонуфузи нозирони тоҷик раванди интихоботи Президенти Ӯзбекистонро мушоҳида менамоянд

Душанбе, 20.10.2016/АМИТ «Ховар»/. Интизор меравад, ки ҳайати бонуфузи Ҷумҳурии Тоҷикистон  таҳти раёсати Бахтиёр Худоёрзода, раиси Комиссияи марказии интихобот ва раъйпурсии Ҷумҳурии Тоҷикистон ҷараёни  баргузории интихоботи  президентиро дар Ӯзбекистон, ки 4 декабри соли 2016 доир мегардад,  мушоҳида намоянд.
Абдуманнон Додозода, роҳбари дастгоҳи Комиссияи марказии интихобот ва раъйпурсии ҷумҳурӣ дар суҳбат ба хабарнигори  АМИТ «Ховар» гуфт, ки «иштироки нозирони тоҷик дар баргузории ин чорабиниии муҳими  сиёсии кишвари ҳамсоя бо даъвати ҷониби Ӯзбекистон сурат мегирад. Намояндагони Тоҷикистон раванди  баргузории интихоботи президентиро дар Ӯзбекистон  дар ҳайати  нозирони байналмилалӣ мушоҳида менамоянд».
Мавриди зикр аст, Комиссияи марказии интихоботи  Ӯзбекистон  чор нафар номзадро барои ноил гардидан ба мансаби президентӣ дар ин кишвар сабти ном намудааст. Ин номзадҳо Шавкат Мирзиёев аз Ҳизби либерал- демократии Ӯзбекистон, Сарвар Отамурадов, роҳбари ҳизби «Миллий тикланиш» /Эҳёи миллӣ/,  Наримон Умаров, роҳбари фраксияи «Адолат» аз Ҳизби сотсиал-демократи Ӯзбекистон ва Ҳотамҷон Кетмонов, раиси Ҳизби халқӣ-демократии Ӯзбекистон  мебошанд.