Ҳайати Тоҷикистон дар Форуми «Ҳамкории Чин ва Осиёи Марказӣ» ширкат варзид

Душанбе, 20.10.2016 /АМИТ «Ховар»/. 19 октябри соли 2016 ҳайати Ҷумҳурии Тоҷикистон бо роҳбарии Сафири Тоҷикистон дар Чин П.Давлатзода дар 4-умин Форуми «Ҳамкории Чин ва Осиёи Марказӣ», ки дар шаҳри Чэндуи музофоти Сичуани Ҷумҳурии Мардумии Чин баргузор шуд, ширкат намуд. Дар Форум атрофи ҳамкории Чин ва давлатҳои Осиёи Марказӣ, бахусус дар заминаи тақвияти ҳамкории минтақавӣ табодули назар сурат гирифт.
П.Давлатзода дар суханронии хеш зикр кард, ки Тоҷикистон ба густариши муносибатҳои ҳамсоягии накӯ, дӯстона ва ҳамкории судманд бо Чин аҳамияти хосса дода, муносибот бо Чин дар сиёсати хориҷии кишвараш мақоми афзалиятнок дорад. Бо назардошти сатҳи баланди эътимоди сиёсӣ, дӯстии устувор ва муносибатҳои шарикии боъэтимоди Тоҷикистону Чин рушди муназзами робитаҳои сиёсӣ, иқтисодӣ ва гуманитарӣ нақши намоён доранд.
Аз рушди бонизом ва натиҷаи ҳамгироии ду кишвар дар соҳаи амният, афзоиши ҳаҷми гардиши савдои хориҷӣ, густариши ҳамкории муваффақ дар татбиқи як қатор тарҳҳои бузурги дорои аҳамияти минтақавӣ изҳори қаноатмандӣ карда шуд. Ба аҳамияти эҷоди «Камарбанди иқтисодии роҳи Абрешим» ҷиҳати тақвияти минбаъдаи ҳамкории иқтисодии ду кишвар дар самти тиҷорати байниминтақавӣ ва ҳамлу нақли транзитӣ, ки ҷавобгӯи манфиатҳои мардумони Осиёи Марказӣ ва Чин ва шукуфоии иқтисодии минтақа аст, таъкид карда шуд.
Роҳбари ҳайати Тоҷикистон инчунин ба иштирокчиёни Форум имкониятҳои тиҷоратӣ- иқтисодӣ ва туристии кишварро муаррифӣ намуд.
Дар Форум ҳайатҳои расмии кишварҳои Осиёи Марказӣ, роҳбарони давлатии Чин, намояндагони вазорату идораҳо, соҳибкорон, олимон ва коршиносон, намояндагони аҳли тиҷорат ва ВАО иштирок намуданд.