Ҷавонони мо дар ҷавоб ба ғамхориҳои давлату ҳукумат бояд масъулиятшинос бошанд

Душанбе, 10.10.2016. /АМИТ «Ховар»/. Шомилшавии ҷавонон ба ҳизбу ҳаракатҳои иртиҷоӣ аз масъалаҳое буд, ки имрӯз зимни суҳбате дар мақомоти иҷроияи ҳокимияти давлатии ноҳияи Шоҳмансур мавриди баррасӣ қарор гирифт.
Чорабинӣ дар доираи «Барномаи миллии рушди иҷтимоии ҷавонони Тоҷикистон барои солҳои 2016-2018» ташкил гардида, роҳбарият, намояндагони КДАМ, ШКД-и ноҳияи Шоҳмансур, Агентии назорати маводи нашъаовари назди Президенти ҶТ, донишҷӯёни Коллеҷи омӯзгорӣ ва таҳсилгирандагони литсейи касбию техникии нақлиёти роҳи оҳани шаҳри Душанбе ҳузур доштанд.
Роҳбарияти бахши ҷавонон, варзиш ва сайёҳии ноҳияи Шоҳмансур ҳадаф аз баргузории ин суҳбатро ҷилавгирии наврасону ҷавонон аз гаравидан ба ҳизбу ҳаркатҳои террористию экстремистӣ, салафия ва хурофотпарастӣ арзёбӣ намуданд.
Иштирокдорон доир ба ин падидаи номатлуб иброз доштанд, ки Ҳукумати ҶТ барои ҷавонон шароити зиндагии мусоидро фароҳам овардааст. Ҷавонони мо низ дар ҷавоб ба ғамхориҳои давлату ҳукумат бояд масъулиятшинос бошанд, Ватанро дӯст доранд, ваҳдати миллиро ҳифз намоянд, зиракии сиёсиро аз даст надода, фирефтаи ваъдаҳои хоҷагони хориҷӣ нашаванд.