Дар Ҳафтаи XXII муттаҳидаи гастроэнтерологии Русия табиби тоҷик раёсатро ба уҳда дошт

Душанбе, 05.10.2016 /АМИТ «Ховар»/. Ҳафтаи XXII муттаҳидаи гастроэнтерологии Русия, ки дар шаҳри Маскави Федератсияи Русия 3 октябр ба кори худ оғоз карда буд, имрӯз ҷамъбаст гардид. Дар он беш аз 4 ҳазор олимону мутахассисони соҳаи тибби на танҳо шаҳрҳои Русия, балки хориҷи кишвар низ ширкат доштанд.
Дар ҷамъомад Тоҷикистонро гастроэнтерологи шинохтаи тоҷик, академик Ғиёсиддин Меъроҷев муаррифӣ кард.
Хотиррасон мекунем, ки ҳамоиш бо ибтикори Ассотсиатсияи гастроэнтерологии Русия, Ҷамъияти Русия оид ба омӯзиши ҷигар ва Академияи илмҳои Русия гузаронида шуд.
Боиси ифтихор аст, ки табиби шинохтаи тоҷик Ғиёсиддин Меъроҷев дар ҳамоиш на танҳо маърӯза кард, балки дар ду машварати пленарӣ раисиро ба уҳда дошт.
Тавре ки Ғиёсиддин Меъроҷев ба хабарнигори АМИТ «Ховар» иброз дошт, дар ҳамоиш вай дар мавзӯъҳои «Ташхиси аввалаи вайроншавии қанд дар беморони фарбеҳ», «Вирпас- доруи нав барои муолиҷаи гепатит ва сиррози вируси С ҷигар» ва «Бемориҳои гранулематозии меъда» маърӯза кард.
«Иштироки намояндагони Тоҷикистон ва раисӣ дар ин ҳамоиши бонуфуз аз он шаҳодат медиҳад, ки соҳаи гастроэнтерологияи тоҷик хеле рушд кардааст ва таҷрибаи олимони моро дар тамоми ҷаҳон мепазиранд. Имрӯз соҳаи гастроэнтерологияи тоҷик дар ташхис ва табобати босифати бемориҳои меъда корҳои зиёдро ба сомон расонида, ба комёбиҳои назаррас ноил гаштааст. Таҷрибаи моро дар ин соҳа духтурони давлатҳои хориҷ низ ба кор мебаранд. Дар маърӯзаҳои худ ман масъалаи ташхис ва роҳҳои табобати бемориҳои меъдаю рӯдаро баррасӣ кардам. Бояд гуфт, ки аз бемориҳои меъда аҳолии бештари ҷаҳон азият мекашанд»,- иброз дошт Ғ. Меъроҷов.
Ғ. Меъроҷев илова намуд, ки дар ҳамоиш олимону духтурон аз Озарбойҷон, Олмон, Эстония, Латвия, Словения, Амрико, Украина ва дигар кишварҳо иштирок карда, мушкилот, дастовард ва дурнамои соҳаи тиббро баррасӣ намуданд.