Дар Панҷакент барои сайёҳон маркази иттилоотӣ кушода мешавад

Душанбе, 27.10.2016 /АМИТ «Ховар»/. Дар доираи сафари кории роҳбарияти Кумитаи ҷавонон, варзиш ва сайёҳӣ ба шаҳру ноҳияҳои Айнӣ, Панҷакент, Истаравшан, Хуҷанд ва Гулистону Бӯстон дар ҳамкорӣ бо ширкатҳои пешқадами сайёҳӣ масъалаи рушди инфрасохтори сари роҳ, хизматрасонии ошхона, тарабхона ва меҳмонхонаҳо мавриди баррасӣ қарор дода шуд. Дар ин бора аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ба АМИТ «Ховар» хабар дода, изҳор намуданд, ки «дар ин ҷараён мулоқоти роҳбарияти Кумита бо ширкатҳои сайёҳии вилояти Суғд баргузор шуда, пешниҳод гардид, ки дар шаҳри Панҷакент бо такя ба имконият ва захираҳои бойи сайёҳӣ, аз қабили Саразми бостон, Панҷакенти қадим, Ҳафткӯл, Панҷрўд, мавзеи сайёҳии Артуч, ёдгории таърихии Хоҷа Муҳаммади Башоро ва Санҷартеппа кушодани Маркази иттилотӣ ва мағозаи савғотӣ барои сайёҳон дар назди Шўрои рушди туризми Зарафшон, ки чанд сол боз фаъолияташ маҳдуд шуда буд, таъсис дода мешавад».
Айни замон мутахассисон барои хизматрасонӣ дар ин марказ то охири сол аз омўзиш ва таҷрибаи марказҳои иттилотии шаҳрҳои Хуҷанд ва Хоруғ гузашта, аз аввали мавсими сайёҳӣ дар соли 2017 он ба таври расмӣ ба фаъолият оғоз менамояд.