Дар шаҳри Норак бо сокинон ҷиҳати пешгирии масрафи беҳудаи неруи барқ суҳбатҳо доир шуданд

Норак, 13.10.2016 /АМИТ «Ховар»/. Мақомоти иҷроияи ҳокимияти давлатии шаҳри Норак барои хуб гузаронидани мавсими тирамоҳу зимистони солҳои 2016-2017 омодагии пурра мебинанд. Барои сари вақт таъмин намудани соҳаҳои буҷетии шаҳр бо сӯзишворӣ аз буҷети шаҳр зиёда аз 104 ҳазор сомонӣ ҷудо гардидааст, ки то имрӯз барои фаъолияти пурсамари муассисаҳои таълимӣ ва томактабӣ 24 тонна ангишт ва 1056 метри кубӣ ҳезум захира намудаанд. Инчунин масъулини муассисаҳои тандурустии шаҳр 115 адад гармкунаки барқӣ, 13 адад печи аловӣ, 2 адад печи дизелӣ ва 5 адад генератори барқдиҳанда, 104 метри кубӣ ҳезум ва 390 литр сўзишворӣ захира кардаанд.
Сардори шуъбаи кадрҳои муассисаи Манзилию коммуналии шаҳри Норак Ҳабиба Шулашова оид ба омодагӣ ва гузаронидани давраи тирамоҳу зимистони солҳои 2016-2017 иброз намуд, ки «Масъулини муассисаи мазкур барои сарфакорона истифода бурдани қувваи барқ, лампаҳо ва таҷҳизоти гармидиҳандаи каммасрафи барқӣ бо сокинони маркази шаҳр вохӯрию суҳбатҳо доир намуда, пешгирии масрафи беҳудаи неруи барқро, ки зарар ба буҷети ҳар оила мебошад, ба сокинон фаҳмониданд. Ҳамчунин то имрӯз муассисаи Хоҷагии манзилию коммуналии шаҳр бо мақсади таъмини фаъолияти мунтазам дар давраи тирамоҳу зимистон техникаҳоро дар ҳолати корӣ нигоҳ дошта, дар анборҳои корхона ба миқдори 36 метри мукааб қуми махсус ва 13,7 тонна намак захира намудаанд».