Даргузашти Сафар Сафаров

Душанбе, 21.10.2016./АМИТ «Ховар»/. Яке аз ходимони намоёни ҳизбию давлатии мамлакат, собиқ муовини якуми Раиси Ҳизби Халқӣ-Демократии Тоҷикистон Сафар Сафаров баъди бемории бардавом дар синни  69-солагӣ аз олам даргузашт.

Тавре ба АМИТ «Ховар» наздикони марҳум хабар доданд, Сафар Сафаров соати 01:00-и шаби гузашта аз ҳаёт чашм пӯшид. Намози ҷанозаи марҳум имрӯз дар Масҷиди марказии шаҳри Душанбе хонда мешавад ва ӯро дар оромгоҳи Сариосиёи Душанбе ба хок месупоранд.

Сафаров Сафар Ғаюрович   22-уми майи соли 1947 таваллуд шудааст. Соли 1970 Донишгоҳи политехникии Тошканд ва соли 1983 Мактаби олии ҳизбии ҳамин шаҳрро хатм намуда, номзади илмҳои иқтисодӣ буд.

Сафар Сафаров солҳои 1991-2000-ум вакили Шӯрои Олӣ ва Маҷлиси намояндагони Маҷлиси Олии Ҷумҳурии Тоҷикистон буд. Вай дар тӯли фаъолияти меҳнатии худ дар вазифаҳои раиси Кумитаи парлумони мамлакат оид ба иқтисод ва буҷет, Роҳбари Дастгоҳи иҷроияи Президенти Ҷумҳурии Тоҷикистон,   Сафири Фавқулода ва Мухтори Ҷумҳурии Тоҷикистон дар Федератсияи Русия, муовини якуми Раиси  Маҷлиси намояндагони Маҷлиси Олии Ҷумҳурии Тоҷикистон ва муовини якуми Раиси Ҳизби Халқӣ-Демократии Тоҷикистон   кор кардааст.

Сафар Сафаров бо ордени «Шараф», медалҳо ва унвони ифтихории «Корманди шоистаи Тоҷикистон», инчунин бо ордени «Дружба» (Русия)  қадр карда шудааст. Соҳиби 5 фарзанд мебошад.

Сафар Ғаюрович  дар давоми фаъолияти худ дар ҳамаи мансабҳои давлатӣ бо Агентии миллии иттилоотии Тоҷикистон «Ховар» ҳамкории зич дошт. Кормандони  АМИТ «Ховар» бинобар даргузашти Сафар Сафаров ба наздикон ва пайвандони марҳум ҳамдардии амиқ изҳор менамоянд.