Композитори тоҷик Ҷӯрабой Охунов аз олам даргузашт

Душанбе, 4.09.2016 /АМИТ «Ховар»/. 2 октябри соли равон яке аз саромадони мусиқии касбии тоҷик, омӯзгори пуртаҷриба, профессор, Арбоби ҳунари Тоҷикистон, аъзои Иттифоқи композиторони Тоҷикистон, композитор Ҷӯрабой Охунов дар 86-солагӣ аз олам даргузашт.
Ҷӯрабой Охунов яке аз сутунҳои устувори кохи бегазанди мусиқии касбии тоҷик буда, тамоми умри пурбаракати хешро барои рушду нумӯи санъати миллати тоҷик сарф намуд.
Композитори маъруф Ҷӯрабой Охунов дар радифи эҷоди асарҳои баландмазмун дар тарбия ва ҳунаромӯзии насли наврас саҳми муносиби хешро гузошта, солҳои зиёд ба ҳайси омӯзгор, директори мактабҳои мусиқии бачагонаи №2, №3, Омӯзишгоҳи мусиқии шаҳри Душанбе, и.в. профессори Донишкадаи давлатии санъати Тоҷикистон ба номи М. Турсунзода, дирижёри Оркестри созҳои миллии Кумитаи телевизион ва радиои назди Ҳукумати Ҷумҳурии Тоҷикистон, муҳаррири калони нашриёти «Ирфон», «Маориф», «Адиб» ва Пажӯҳишгоҳи илмӣ-тадқиқотии фарҳанг ва санъат фаъолият намудаааст.
Истеъдоди ӯ махсусан дар жанри кантатаву оратория ба таври возеҳ ҳувайдо гардидааст.
Бояд гуфт, ки кантатаи «Шараф ба партия» дар шаҳрҳои Маскав, Вилнюс, Шоулияи Свердловск (Екатеринбург), Новосибирск ва Тошканд иҷро карда шудааст.
Ҷӯрабой Охунов ҳамчун омӯзгори пуртаҷриба зиёда аз 2500 нафар шогирдонро ба камол расонида, дар навиштани китобҳои дарсии зиёд (бештар аз 30 номгӯй) ба комёбиҳо ноил гаштааст.
Дар ин бора аз Вазорати фарҳанги Ҷумҳурии Тоҷикистон ба АМИТ «Ховар» хабар доданд.