«Корҳои илмӣ — инноватсионии ҷавонон»- конфронси илмӣ бахшида ба Рӯзи Конститутсия дар Данғара

Қӯрғонтеппа, 31.10.2016 /АМИТ «Ховар»/. Дар шаҳру ноҳияҳои вилояти Хатлон бахшида ба Рӯзи Конститутсияи Ҷумҳурии Тоҷикистон баргузории силсилабарномаҳо дар назар аст.
Тавре аз шуъбаи иттилоотӣ-таҳлилии мақомоти иҷроияи ҳокимияти давлатии вилояти Хатлон иттилоъ доданд, ҳамарӯза дар муассисаҳои таълимии вилоят конфронсу семинарҳо ва суҳбатҳо оид ба нақши Конститутсия, волоияти қонун ва ҳифзи муқаддасоти миллӣ баргузор мешаванд.
Дар робита ба ин дар ноҳияи Данғара бахшида ба Рӯзи Конститутсияи Ҷумҳурии Тоҷикистон дар мавзӯи «Корҳои илмӣ — инноватсионии ҷавонон» конфронси илмӣ баргузор гардид.
Тавре аз Раёсати кор бо ҷавонон, варзиш ва сайёҳии вилояти Хатлон иттилоъ доданд, дар конфронс олимони ҷавон ва устодони донишгоҳҳо дар бораи саҳми ҷавонон дар пешрафти илм ва аҳамияти Конститутсияи Ҷумҳурии Тоҷикистон маърӯзаҳои илмӣ карданд.