Масъалаҳои баҳсноки забони ВАО дар ДМТ баррасӣ мешаванд

Душанбе, 17.10.2016. /АМИТ «Ховар»/. 25-26-уми октябри соли равон бо ибтикори кафедраи услубшиносӣ ва таҳрири адабии факултети журналистикаи Донишгоҳи миллии Тоҷикистон (ДМТ) таҳти унвони «Масъалаҳои баҳсноки забони ВАО» конфронси ҷумҳуриявии илмию амалӣ баргузор мегардад.
Дар конфронси мазкур мавзӯъҳои забони ВАО ҳамчун як забони миллӣ; саҳми забони ВАО дар рушду такомули забони адабии ҳозираи тоҷик; масъалаҳои забони матбуот ва воситаҳои электронии ахбор, аз ҷумла радио, телевизион ва интернет; хусусиятҳои забонии услуби публитсистӣ ва риояи меъёрҳои забони ВАО баррасӣ мегарданд.
Мақсади конфронс арҷгузорӣ ба забони давлатӣ ва риояи меъёрҳои он дар воситаҳои ахбори омма мебошад.
Забони конфронс тоҷикӣ ва русӣ буда, маърӯзаҳои муҳокимагардида дар шакли маҷмӯа нашр карда мешаванд.
Дар ин бора аз факултети журналистикаи ДМТ ба АМИТ «Ховар» хабар доданд.