Намоишгоҳи шашуми байналмиллалии «Китоби Душанбе»-воситаи хуб барои рушди санъати ноширии тоҷик

Душанбе, 07.10.2016. /АМИТ «Ховар»/. Имрӯз дар назди бинои Иттифоқи нависандагони Тоҷикистон бо ибтикори Вазорати фарҳанги Ҷумҳурии Тоҷикистон бахшида ба 25-умин солгарди Истиқлолияти давлатии Ҷумҳурии Тоҷикистон Намошгоҳи шашуми байналмилалии «Китоби Душанбе» доир гардид.
Дар намоишгоҳи мазкур ноширони дохилу хориҷи кишвар, ба монанди Комбинати полиграфии шаҳри Душанбе, Муассисаи давлатии нашриёти «Адиб», Муассисаи давлатии нашриёти «Ирфон», Пажӯҳишгоҳи фарҳанг ва иттилоот, намояндагони Русия, Ҳиндустон, Туркия, Чин ва Беларус иштирок намуда, китобҳои тозанашри худро ба намоиш гузоштанд.
«Мақсади асосии намоишгоҳ- баланд бардоштани сифати китобҳо дар нашриёт, дастрас гардонидани маводи нави чопӣ аз тариқи воситаҳои ахбори омма, паҳн гардонидани онҳо, болобурди сифати китобҳои нашршаванда ва пайдо намудани хонандагони ҷадид ба китобҳои тозанашр мебошад»,-гуфт Номвар Қурбонов, масъули Кумитаи тадорукоти Намошгоҳи шашуми байналмилалии «Китоби Душанбе».
Шариф Комилзода, директори Пажӯҳишгоҳи илмӣ-тадқиқотии фарҳанг ва иттилооти Вазорати фарҳанги Ҷумҳурии Тоҷикистон ба хабарнигорон иттилоъ дод, ки «хушбахтона, дар тӯли даврони Истиқлолият аз ҷониби ноширони кишвар сатҳу сифати нашри китобҳо беҳтар гардид ва ин имкон дод, ки ноширони тоҷик дар як зумра озмунҳо ва фестивалҳои байналмилалӣ иштирок намуда, соҳиби шоҳҷоизаҳо гарданд ва ба ҳамин васила рушду нумуи санъати ноширии тоҷикро ба намоиш гузоранд».
Ёдовар мешавем, ки Намоишгоҳи мазкур то 9 октябр идома ёфта, дар он боздиди ноширони хориҷӣ аз муҷассамаи Исмоили Сомонӣ, Парчами миллӣ ва Китобхонаи миллӣ дар назар дошта шудааст.