Намояндагони Тоҷикистону IFAD таъмини амнияти озуқавориро баррасӣ намуданд

Душанбе, 26.10.2016. /АМИТ «Ховар»/. Рушди ҳамкорӣ дар соҳаи кишоварзӣ, таъмини амнияти озуқаворӣ, рушди минтақаҳо ва баланд бардоштани сатҳи некуаҳволии мардуми кишвар аз масъалаҳое буданд, ки зимни мулоқоти муовини вазири рушди иқтисод ва савдои Ҷумҳурии Тоҷикистон Умед Давлатзод бо ҳайати намояндагони Бунёди байналмилалии рушди кишоварзӣ (IFAD), ки таҳти роҳбарии Директори Департаменти Шарқи Наздик, Африқои Шимолӣ, Аврупо ва Осиёи Марказӣ Халида Бузар ба Душанбе ташриф овардаанд, баррасӣ гардид.
Тавре аз Вазорати рушди иқтисод ва савдои кишвар хабар доданд, мулоқот дар фазои ҳамдигарфаҳмӣ сурат гирифта, ҷонибҳо азми қавии худро ҷиҳати густариши минбаъдаи ҳамкорӣ байни Вазорати рушди иқтисод ва савдо ва ин ташкилоти бонуфузи кишоварзӣ дар самтҳои мазкур баён доштанд.