«Сотим Улуғзода» ва «Султон Умаров» бо қалами Усмонҷон Ғаффоров ба нашр расиданд

Хуҷанд, 26.10.2016 /АМИТ «Ховар»/. 25 октябр дар шаҳри Хуҷанд маҳфили рӯнамоии ду китоби тозанашри муаррих ва публитсист, профессор Усмонҷон Ғаффоров «Сотим Улуғзода» ва «Султон Умаров» баргузор шуд.
Дар маҳфил адабиётшиносон Фахриддин Насриддинов, Нуралӣ Нуров, Субҳони Аъзамзод ва олими физик Ҳайдар Саидов роҷеъ ба аҳамият ва арзиши китобҳои таърихнигор изҳори андеша намуда, ба гиромидошти номи фарзандони барӯманди миллати тоҷик машғул шудани муаллифро иқдоми хайру кори савоб донистанд.
Дар музокира адабиётшинос, профессор Атахон Сайфуллоев ва Нависандаи халқии Тоҷикистон Муҳиддин Хоҷазод сухан карда, барои дар сатҳи баланд таълиф намудани асарҳои марбут ба зиёиёни тоҷик маслиҳатҳои судманд доданд.
Усмонҷон Ғаффоров иброз дошт, ки дар оянда барои муаррифӣ намудани чеҳраҳои барҷастаи тоҷик ба насли имрӯзу оянда кӯшиш мекунад.
Дар ин бора аз Китобхонаи вилоятии ба номи Тошхӯҷа Асирӣ хабар доданд.