«Терроризм ва экстремизм таҳдид ба суботу амнияти ҷаҳониянд»-ҳамоиши судманд дар Норак

Норак, 28.10.2016 /АМИТ «Ховар»/. Мудирони шуъбаю бахшҳои мақомоти иҷроияи ҳокимияти давлатии шаҳри Норак дар ҳамбастагӣ бо мақомоти ҳифзи ҳуқуқи шаҳр баҳри риояи қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи танзими анъана ва ҷашну маросимҳо», «Дар бораи озодии виҷдон ва иттиҳодияҳои динӣ», пешгирии шомилшавии ҷавонон ба ҳизбу ҳаракатҳои ифротгаро, иштирок дар муноқишаҳои дигар давлатҳо, побанди фарҳанги бегона нагаштани ҷавонон ва пошхӯрии оилаҳои ҷавон бо сокинони маҳаллаи Лангар вохӯрии судманд баргузор намуданд.
Дар вохӯрӣ таъкид гардид, ки ифротгароӣ, терроризм ва гаравидани ҷавонон ба фарҳанги бегона таҳдид ба суботу амнияти ҷаҳониянд ва онҳо асосҳои маънавии ҷомеаро нобуд сохта, ҳуқуқу озодиҳои инсонро поймол ва ба ҷомеаи мутамаддин хатар эҷод мекунанд.
Аз ҷавонон даъват ба амал оварда шуд, ки ба хотири ҳифзи манфиатҳои давлатдории миллӣ ва таъмини рушди устувори иқтисодию иҷтимоӣ ва фарҳангӣ зиракии сиёсиро аз даст надода, дар оромию осудагии кишвар саҳми арзанда гузоранд.