Тоҷикистон ва Чин: мубодилаи донишҷўёнро метавон дар оянда бештар тақвият дод

Душанбе, 20.10.2016 /АМИТ «Ховар»/. Минбаъд ҷиҳати рушди ҳамкорӣ байни Ҷумҳурии Тоҷикистон ва Ҷумҳурии Мардумии Чин дар соҳаи маориф дар оянда метавон мубодилаи донишҷўёнро зиёд намуд ва дар самти маориф ва илм корҳои зиёди муштаракро анҷом дод. Ин ва дигар масъалаҳои мубрамро дирӯз, 19 октябр вазири маориф ва илми кишвар Нуриддин Саид бо муовини котиботи генералии Созмони ҳамкории Шанхай Ван Кай Вэн ва мутахассиси Созмони ҳамкории Шанхай Шайдогул Закирова баррасӣ намуданд.
Тавре ки аз хадамоти матбуоти вазорат иттилоъ доданд, дар вохўрӣ ҷонибҳо аз ҳамкории мавҷуда дар соҳаи маориф ва илм натиҷагирӣ намуда, вобаста ба рушди он ибрози андеша намуданд.
Дар ҷараёни суҳбат зикр гардид, ки дар Ҷумҳурии мардумии Чин сифати таҳсилот баланд буда, аз кишварҳои мухталиф донишҷўёни зиёд ба муассисаҳои таҳсилоти олии ин кишвар қабул карда мешаванд.
Бояд гуфт, ки мулоқот дар доираи Машварати 6-уми вазирони маорифи кишварҳои Созмони ҳамкории Шанхай, ки дар Китобхонаи миллии Тоҷикистон ҷараён дорад, баргузор шуд.