Вениамин Каганов: «Довталабони тоҷике, ки барои таҳсил ба Русия мераванд, бояд аввал аз курси тайёрӣ гузаранд»

Душанбе, 24.10.2016 /АМИТ «Ховар»/.  Минбаъд  довталабоне, ки барои таҳсил ба Федератсияи Русия мераванд, бояд  пеш аз таҳсил курсҳои тайёриро гузаранд. Ин пешниҳодро муовини вазири маориф ва илми Федератсияи Русия Вениамин Каганов  зимни мулоқот бо вазири маориф ва илми Ҷумҳурии Тоҷикистон Нуриддин Саид ироа намуд. Вениамин Каганов ҳамчунин таклиф кард, ки дар қадами аввал ба таври таҷрибавӣ метавон омўзгоронро ба курсҳои такмили ихтисоси семоҳа ҷалб кард.
Ҷонибҳо зимни мулоқот инчунин  вобаста ба таҳсили донишҷўёни тоҷик дар Федератсияи Русия, такмили ихтисоси омўзгорон, таъмини мактабҳо ва синфҳои русӣ бо китобҳои дарсӣ, қабули донишҷўён ба филиалҳои муассисаҳои таҳсилоти олии касбии дар Тоҷикистон фаъол ва дигар масъалаҳо табодули андеша намуданд.
«Имрўзҳо Вазорати маориф ва илми Ҷумҳурии Тоҷикистон стандартҳои ягонаи давлатиро таҳия намудааст, ки дар асоси онҳо китобҳои ягонаи таълимӣ роҳандозӣ шудаанд. Ҳамчунин Фонди гардиши китоб  фаъол аст, ки китобро барои се сол ба иҷора дода, ба ин восита хонандагон бо китоби доимӣ таъмин мегарданд. Ин  таҷрибаро метавон омўхт ва дар низоми маорифи Русия низ ҷорӣ кард»,-иброз дошт В.Каганов.
Нуриддин Саид иброз дошт, ки Вазорати маориф ва илми Ҷумҳурии Тоҷикистон омодаи ҳамкорӣ буда, ҷиҳати рушду вусъат бахшидани муносибот тадбирҳои зарурӣ меандешад.