11 ноябр-Рӯзи офтолмологҳо. Дар Тоҷикистон ҳамагӣ 258 табиби бемории чашм фаъолият мекунад

Душанбе, 11.11.2016 /АМИТ «Ховар»/. Ҳамасола дар як қатор мамлакатҳои ҷаҳон 11 ноябр ҳамчун Рӯзи офтолмологҳо, яъне духтурони бемориҳои чашм таҷлил карда мешавад. Чашм яке аз асоситарин узви инсон ба ҳисоб меравад. Ба ин хотир ҳар як инсон пайваста бояд аз назорати духтури чашм гузарад. Бахшида ба ин рӯз мухбири АМИТ «Ховар» бо муовини директори Муассисаи давлатии «Маркази ҷумҳуриявии клиникии бемориҳои чашм» Меҳриниссо Назифова ҳамсуҳбат гардид.
«Дар ҷумҳурӣ ҳамагӣ 258 табиби бемории чашм фаъолият мекунанд. Дар Муасиссаи давлатии «Маркази ҷумҳуриявии клиникии бемориҳои чашм» 25 нафар табиб ба беморон хизмат мерасонанд, ки аз онҳо 7 нафар табибони ҷарроҳ мебошанд. Дар марказ дармонгоҳи калонсолон ва кӯдакона фаъол буда, он дорои 80 кат аст, ки 20-тоаш барои кӯдакон ҷудо шудааст. Табибони мо баҳри баланд бардоштани савияи дониши худ пайваста аз такмили ихтисос гузашта, ба хориҷи кишвар сафар мекунанд. Ҳамасола духтурони мо дар чашми одамон садҳо ҷарроҳиҳои нурӣ мегузаронанд»,- зикр намуд М. Назифова .
Бино ба гуфтаи мусоҳиб, дар 9 моҳи соли равон дар марказ 3 ҳазору 205 нафар бемор муолиҷа ёфтаанд, ки аз инҳо қисми зиёдашон гирифтори бемориҳои парда гирифтани чашм, бемориҳои қарния ва оби марворид мебошанд. Дар дармонгоҳ шуъбаи дармонгоҳӣ низ мавҷуд буда, дар 9 моҳи соли равон ҳамагӣ 4 ҳазору 195 нафар ба ин дармонгоҳ муроҷиат намудаанд, ки аз онҳо 1764 нафарашонро кӯдакон ташкил медиҳанд.
«Беморхонаи мо Маркази ҷумҳуриявӣ буда, ба мо аз тамоми гӯшаю канори мамлакат муроҷиат мекунанд. Новобаста ба пешравиҳо, дар соҳа камбудиҳо низ мавҷуданд. Як мушкилии мо- ин норасоии духтурони чашм дар баъзе ноҳияҳои ҷумҳурӣ мебошад», — бо таассуф гуфт мусоҳиб.
Хотиррасон мекунем, ки моҳи ноябри соли 2015 бо дастгирии Ҳукумати Ҷумҳурии Тоҷикистон ва Вазорати тандурустии мамлакат Анҷумани якуми байналмилалии офтолмологҳои Ҷумҳурии Тоҷикистон баргузор гардида буд. Дар он мутахассисони касбии соҳаи кишвар ва табибон аз хориҷи мамлакат иштирок намуданд.