Дар Душанбе Форуми дуюми миллӣ оид ба волоияти қонун баргузор мегардад

Душанбе, 1.11.2016. /АМИТ «Ховар»/. 3 ноябри соли 2016 дар Китобхонаи миллии Тоҷикистон Форуми дуюми миллӣ оид ба волоияти қонун баргузор мегардад.
Баргузор намудани Форуми миллӣ ба 22-юмин солгарди Конститутсияи Ҷумҳурии Тоҷикистон рост омада, идомаи Форуми якуми миллии муваффақест, ки соли 2015 ташкил шуда буд.
Тавре ба хабарнигори АМИТ «Ховар» аз Вазорати адлияи Ҷумҳурии Тоҷикистон хабар доданд, дар форум масоили вобаста ба самтҳои асосии рушди қонунгузорӣ ва таҷриба дар соҳаи адлия, мушкилоти рӯзмарраи ҳуқуқҳои гражданӣ, оилавӣ ва ҷиноӣ, инчунин соҳибкорӣ ва андозбандӣ мавриди баррасӣ қарор хоҳанд гирифт. Илова бар ин, масоили марбут ба уҳдадориҳои байналмилалии Ҷумҳурии Тоҷикистон дар соҳаи ҳуқуқи инсон муҳокима карда хоҳанд шуд. Дар кори Форум намояндагони сохторҳои давлатӣ, доираҳои илмӣ, ҷомеаи шаҳрвандӣ ва шарикони рушд иштирок мекунанд.
Дар доираи баргузории Форум қабули Эъломияи душанбегии Форуми дуюми миллӣ оид ба волоияти қонун дар Ҷумҳурии Тоҷикистон пешбинӣ шудааст.
Созмондиҳандагони Форум Ҳукумати Ҷумҳурии Тоҷикистон ва Вазорати адлияи Ҷумҳурии Тоҷикистон маҳсуб ёфта, он бо дастгирии Барномаи рушди СММ дар Тоҷикистон, филиали Ассотсиатсияи «Ҳелветас Свисс Интеркооперейшен» дар Ҷумҳурии Тоҷикистон ва дастгирии молиявии Агентии Швейтсария оид ба рушд ва ҳамкорӣ ташкил шудааст.