Дар Душанбе Хадамоти зиддиинҳисорӣ дар мавзӯи «Назария ва амалияи қонунгузории зиддиинҳисорӣ» машварат доир кард

Душанбе, 25.11.2016/АМИТ «Ховар»/. Имрӯз дар меҳмонхонаи «Серена»-и шаҳри Душанбе Хадамоти зиддиинҳисории назди Ҳукумати Ҷумҳурии Тоҷикистон дар мавзӯи «Назария ва амалияи қонунгузории зиддиинҳисорӣ» машварат доир кард.
Саъдӣ Қодирзода, сардори Хадамоти зиддиинҳисории назди Ҳукумати Ҷумҳурии Тоҷикистон зикр кард, ки: «яке аз самтҳои фаъолияти Хадамоти зиддиинҳисории назди Ҳукумати Ҷумҳурии Тоҷикистон- ин ҳимояи ҳуқуқи истемолкунандагон мебошад. Тибқи талаботи Қонуни Ҷумҳурии Тоҷикистон «Дар бораи ҳуқуқи истеъмолкунандагон»-ин дар мақомоти иҷроияи ҳокимияти давлатӣ дар маҳалҳо ташкил намудани сохторҳои дахлдор оид ба ҳуқуқи истеъмолкунандагон мебошад, ки мо дар ин бора тадбирҳои дахлдор андешида, аз рӯи он амал намуда истодаем».
«Мақсади машварати имрӯза- бори дигар ба диққати аҳли ҷомеа, намояндагони мақомоти ҳокимияти маҳаллӣ, вазорату идораҳои дахлдор расонидани талаботи қонунгузории зиддиинҳисорӣ мебошад»,- иброз дошт Рустам Қурбонов, сармутахасисии Хадамоти зиддиинҳисории назди Ҳукумати Ҷумҳурии Тоҷикистон.
Ёдовар мешавем, ки дар машварат намояндагони Хадамоти зиддиинҳисории назди Ҳукумати Ҷумҳурии Тоҷикистон, шуъбаи Хадамоти зиддиинҳисорӣ дар шаҳри Душанбе ва раисони бозорҳои пойтахт иштирок намуда, оид ба масоили қонунгузории зиддиинҳисорӣ сухан гуфтанд.