Дар филиали Донишгоҳи давлатии Маскав дар Душанбе Рӯзи Президентро таҷлил карданд

Душанбе, 16.11.2016 /АМИТ «Ховар»/. Имрӯз дар филиали Донишгоҳи давлатии Маскав ба номи М.В. Ломоносов дар шаҳри Душанбе бахшида ба таҷлили Рӯзи Президенти Ҷумҳурии Тоҷикистон ҳамоиш баргузор гардид.
Рустам Ёрбобоев, мудири китобхонаи илмии филиали Донишгоҳи давлатии Маскав ба номи М.В. Ломоносов дар шаҳри Душанбе гуфт, ки: «саҳми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар барқарор намудани сулҳ, пешрафти мамлакат ва шинохти миллӣ бузург аст. Имрӯз ҷавононро лозим аст, ки аз баргузории ин гуна ҷамъомадҳо истифода баранд ва дониши худро доир ба корнамоиҳои Сарвари кишвар зиёд намоянд».
«Устодону донишҷӯёни филиали Донишгоҳи давлатии Маскав ба номи М.В. Ломоносов доир ба зиндагинома ва хизматҳои Эмомалӣ Раҳмон маърӯза намуда, саҳми Президенти кишварро дар самти ба даст овардани Истиқлолияти давлатӣ ва пойдор нигоҳ доштани сулҳ назаррас арзёбӣ намуданд»,-хабар медиҳад хабарнигори АМИТ «Ховар».
Ба иттилои манбаъ, имрӯз зиёда аз 300 нафар донишҷӯёни филиали Донишгоҳи давлатии Маскав дар Душанбе аз осорхонаи миллӣ дидан намуда, бо толори туҳфаҳои Президент ва асарҳои рассомоне, ки ба мавзӯи Рӯзи Президент бахшида шудаанд, аз наздик шинос мегарданд.