Дар Суғд беш аз 900 номгўй дорувории пастсифат нобуд карда шуд

Душанбе, 03.11.2016. /АМИТ «Ховар»/. Давоми соли равон аз тарафи кормандони Раёсати Хадамоти назорати давлатии фаъолияти фарматсевтӣ дар вилояти Суғд баҳри таъмини мардум бо маводи доруворӣ, молҳои тиббӣ, маводи ороишию гигиенӣ ва иловаҳои фаъоли биологии хушсифат дар 559 муассисаи фарматсевтӣ, 79 муассисаи табобатию профилактикӣ, новобаста аз шакли моликияташон ва 261 мағоза, нуқтаву дўконҳои фурўши маводи ороишию гигиенӣ санҷишҳо гузаронида шуданд.
Бино ба иттилои сардори Раёсати Хадамоти назорати давлатии фаъолияти фарматсевтӣ дар вилоят Диловар Холов, дар натиҷаи санҷишҳо чанд номгўй молҳои тиббӣ ва маводи ороишию гигиении муҳлати истифодаашон гузашта, маводи доруворӣ ва молҳои тиббии бе сертификати мутобиқати сифат ва маводи ороишию гигиении ба талаботи стандартҳои муқарраршуда ҷавобгўй набуда дарёфт карда шуд.
Аз тарафи Раёсати Хадамот беш аз 900 номгўй ба миқдори 241 038 адад маводи доруворӣ, молҳои тиббӣ, маводи ороишию гигиенӣ ва иловаҳои фаъоли биологии муҳлати истифодаашон гузашта, бе сертификати мутобиқати сифат ва ба талаботи стандартҳои муқарраршуда номувофиқ сўзонида шуданд.