Дар Вазорати фарҳанг намоиш ва фурӯши китобҳо ба ифтихори Рӯзи Президент оғоз шуд

Душанбе, 16.11.2016 /АМИТ «Ховар»/. Имрӯз, 16 ноябр ба ифтихори Рӯзи Президенти Ҷумҳурии Тоҷикистон дар саҳни бинои Вазорати фарҳанги кишвар намоиш ва фурӯши китобҳо оғоз гардид. Дар ин бора аз Вазорати фарҳанги ҷумҳурӣ ба АМИТ «Ховар» хабар доданд.
«Дар намоиш китобҳои олимон ва муҳаққиқон оид ба хизматҳои беназири Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои халқи тоҷик ва инчунин осори худи Сарвари кишвар пешкаши ҳаводорони адабиёт гардидааст»,-хабар медиҳад манбаъ.
Ба таъкиди Вазорати фарҳанги ҷумҳурӣ, имрӯз дар саросари Тоҷикистон бори нахуст Рӯзи Президенти Ҷумҳурии Тоҷикистон таҷлил мешавад ва ба муносибати ин ҷашн дар ҳама муассисаҳои театрӣ ва консертӣ, Сирки давлатии Тоҷикистон, осорхонаҳо, боғҳои фарҳангиву фароғатии шаҳр намоишҳои ройгон ва рӯзи дарҳои кушод гузаронида мешаванд.
Баргузории барномаҳо бахшида ба ин ҷашн имрӯз дар ҳама муассисаҳои таълимӣ ва фарҳангии кишвар низ дар назар аст.