Дар вилояти Суғд истеҳсоли ангишт 1,5 баробар афзудааст

Хуҷанд, 12.11.2016. /АМИТ «Ховар»/. Ангиштканони кони калонтарини вилояти Суғд- «Фон – Яғноб»-и ноҳияи Айнӣ давоми 10 моҳи соли равон 552,4 ҳазор тонна ангишт истихроҷ намуданд, ки ин рақам дар муқоиса бо ҳамин давраи соли гузашта 64,4 ҳазор тонна зиёд буда, 113,2 фоизро ташкил медиҳад. Тавре мудири шуъбаи энергетика ва саноати мақомоти иҷроияи ҳокимияти давлатии вилояти Суғд Озифхон Шарифзода  ба хабарнигори АМИТ «Ховар» хабар дод, дар ин давра нишондиҳандаи баландтарини суръати афзоиши истихроҷи ангишт аз байни нуҳ кони ангишти вилоят ба корхонаи хурдакаки «Ғузн»-и ноҳияи Кўҳистони Мастчоҳ рост омад. Корхонаи мазкур ҳамагӣ 2,2 ҳазор тонна ангишт истихроҷ карда бошад ҳам, лек суръати афзоиши он нисбат ба ҳамин давраи соли гузашта 454,2 фоизро ташкил дод.

Дар умум давоми 10 моҳи соли равон аз ҷониби ангиштканони конҳои ангишти вилоят 989,9 ҳазор тонна ангишт истихроҷ карда шудааст, ки ин нишондод нисбат ба ҳамин давраи соли гузашта 345,2 ҳазор тонна ё худ 1,5 маротиба зиёд мебошад.