Фаъолзанони Восеъ никоҳи хешутабориро маҳкум карданд

Восеъ, 19.11.2016 /«АМИТ «Ховар»/. Бо мақсади баланд бардоштани сатҳи огоҳонии занону духтарон оид ба паҳншавии фарҳанги бегона дар ноҳияи Восеъ вохӯрии занони фаъол баргузор шуд.
Қумринисо Сангалиева, корманди бахши кор бо занон ва оилаи назди Ҳукумати вилояти Хатлон иброз дошт, ки никоҳи хешутаборӣ яке аз масъалаҳои доғи рӯз мебошад.
«Ба гуфтаи мутахассисони соҳаи тандурустӣ 90 фисади шаҳрвандоне, ки никоҳи хешутаборӣ доранд, кӯдакони носолим ба дунё овардаанд ё бо ҳар роҳ аз ҳам ҷудо шудаанд»,-гуфт мавсуф.
Ҳачунин дар вохӯрӣ зикр шуд, ки то ҳанӯз баъзе шахрвандон хилофи қонунҳои Ҷумҳурии Тоҷикистон «Дар бораи танзими анъана ва ҷашну маросимҳои миллӣ», «Дар бораи масъулияти падару модар дар таълиму тарбияи фарзанд» ва дигар қонунҳо амал карда, ба қонуншиканӣ роҳ медиҳанд.
Бо ташаббуси бахши кор бо занон ва оилаи Мақомоти иҷроияи ҳокимияти давлатии вилояти Хатлон чунин вохӯриҳо дар ҳамаи шаҳру ноҳияҳо гузаронида мешаванд.